Энэ сард Америкийн хөрөнгийн зах зээлд эрс тэрс дүр зураг ажиглагдлаа. 10 сарын 6-наас хойш технологийн болон чипийн 47 луугар компани нийт $5 их наядын үнэлгээгээ салхинд хийсгэсэн бол бусад 625 томоохон компанийн үнэлгээ $1.3 их наядаар өсжээ.

🥴 Цөөн компанид төвлөрөв

Зах зээлийн сандралын борлуулалт зөвхөн AI салбарыг чиглэсэн бөгөөд уналт цөөн компани дээр төвлөрч байна. S&P 500 (^GSPC) индекс 0.6% буурсан ч салбарын 11 индексийн 9 нь 1% орчмоор өссөн нь үүнийг батална.

• 🔻 Гигантуудын алдагдал: Nvidia (NVDA) болон Alphabet (GOOG) тус бүр $834 тэрбум, SpaceX (SPCX) $505 тэрбум, TSMC (TSMC34.SA) $395 тэрбумын үнэлгээгээ алдаж, Nvidia, Alphabet хоёр нийт алдагдлын 1/3-ийг бүрдүүлэв.

📉 Гол асуудал нь эрэлт биш, өгөөж

Уг уналт AI-н эрэлт суларснаас бус хөрөнгө оруулалтын өгөөж тодорхойгүй байгаатай холбоотой. III улиралд Alphabet, Amazon (AMZN) болон Meta (META)-н чөлөөт мөнгөн урсгал сөрөг гарсан. Харин эсрэг талд ирэх жил ч эерэг мөнгөн урсгал хадгалах хүлээлттэй байгаа Microsoft (MSFT)-н хувьцааны үнэ тогтвортой байв.

• 👇 Уналт дуусаагүй: Санах ойн чипийн үнэ нэмэгдэж, компьютерын эрэлт буурснаас үүдэн Intel (INTC) ээлжит улирлын ашгийн төсөөллөө бууруулсан. Үүнээс болж хөрөнгө оруулагчдын итгэл буурч, хувьцаа нь ганцхан өдрийн дотор 28.6% огцом уналаа.

🤔 Цаашдын шалгуур 

AI-д түшиглэсэн зах зээл цаашид түүхэн өсөлтөө үргэлжлүүлэх үү, эсвэл дарамтад орох уу гэсэн зааг дээр ирээд байна. Одоо Apple (AAPL)-н санхүүгийн тайлан болон Америкийн завсрын сонгуулийн үр дүн зах зээлийн ойрын чиг хандлагад нөлөөлөхөөр байгаа. 11 сарын 18-нд гарах Nvidia-н тайлан ч чухал. Тус компанийн үр дүн AI-д оруулж буй асар их хөрөнгө оруулалт бодит орлого, ашиг болж хувирч байгаа эсэхийг харуулах учиртай. Технологийн хувьцаануудын уналт үргэлжлэх эсэх нь тун сонирхолтой байна даа.