COP17 маргааш дуусна. Хурлын сүүлийн 7 хоногт нэлээдгүй бужигнаж, энд ч нэг ногоон сан, тэнд ч нэг ногоон санаачилга, бүтээн байгуулалт гэхчлэн толгой эргэм олон хамтралууд зарлагдлаа. Мэдээллүүдээ цэгцлээд нэг хараадахъя. 

• ✒️ Жич: Бид уг хурлыг зохион байгуулах амлалтыг аль 2 жилийн өмнө өгчихсөн буюу хурлын үр дүн гээд байгаа зарим санал, санаачилгуудыг COP17-н үеэр зарлах, танилцуулахаар бэлтгэл ажлаа өмнө нь эхлүүлсэн төслүүд байгаа шүү. Угаасаа л хэрэгжиж байсан төсөл гээд байв. 😌

💰 Зээл & санхүүжилт

Монгол Улсын зохион байгуулсан COP17 бага хурлын гол үр дүн буюу санхүүжилт босгох тал дээр ЗГ 5 тивийн 23 улсад хэрэгжих төслүүдэд зориулан $1.3 тэрбумын санхүүжилт босгохоор болсноо зарласан. Энэ нь өмнөх буюу Саудын Арабын зохион байгуулсан COP16 хурлын санхүүжилтээс ойролцоогоор 9 дахин бага дүн. Гэвч анхааруулаад хэлэхэд, COP16-н санхүүжилт түүхэн өндөр үзүүлэлт юм байна лээ шүү. 

• 💁‍♀️ Харин уг хурлыг тохиолдуулан Монгол Улс өөрийн төслүүдэд татсан санхүүжилтийг харвал, Нийслэлийн ногоон төслүүдэд $400 сая, Азийн Хөгжлийн Банкны дэмжлэгтэй ногоон дата төв барихад $2 тэрбум орчим, Дэлхийн банкнаас $100 сая хүртэлх санхүүжилт татах боломж, Европын хөрөнгө оруулалтын банкнаас ойн аж ахуй, газрын нөхөн сэргээлтэд €200 сая хүртэлх зээл авах боломжууд нээгдээд буй. 
• ✨ Цаашлаад, манай улс гэсэн 2 ч сангийн нээлтийг хийгээд амжсан. Үүний нэг нь $50 саяын анхдагч хөрөнгө оруулалттай боссон Ногоон Санхүүгийн Корпорац, нөгөөх нь Бүсийн ногоон, хүртээмжтэй ХАА-н бизнесийн хувийн хөрөнгө оруулалтын сан (GIRAF). Гэснээс GIRAF-г Хөгжлийн банкны охин компани Ди Би Эм ассет менежмент ХХК удирдан авч явах аж. Мөн Монголын Бизнесийн Зөвлөл (BCM) Business4Land ОУ-ын сүлжээний нэг хэсэг болж Монгол дахь оффисыг байгуулж, хариуцан ажиллахаар болсон.

Аан бас гаднаас ХААН Банк ХК (KHAN) $50 сая, ХасБанк ХК (XAC) $40 саяын санхүүжилтийг тус тус татаад буй. 

🧑‍🤝‍🧑 Хамтын ажиллагаа

Тус хурлын хамгийн онцлох хамтын ажиллагаа бол яахын аргагүй үндэсний AI дэд бүтцийг байгуулахаар Америкийн эрчим хүчний хэмнэлттэй AI чип үйлдвэрлэгч Blaize (BZAI)-тэй хам хамтрахаар болсон явдал. Уг хамтын ажиллагааны дэлгэрэнгүйг ЭНД-ээс уншаарай. 

Эцэст нь… Үнэхээр зүй зохистой, хэлсэн ярьснаараа бүтээн байгуулалт, хөрөнгө оруулалтуудаа хийгээд явдаг сан бол COP17 хурлын үр дүн Монголд ихээхэн өгөөж өгөхөөр байна. Гэвч бидэнд хөрөнгө мөнгөнөөс илүү шударга, нээлттэй жинхэнэ утгаараа хэрэгждэг шилэн системийн хэрэгжилт, хяналт хэрэгтэй байна даа.