Нэткапитал Финанс Корпораци ББСБ-ын хоёр дахь хөрөнгөөр баталгаажсан үнэт цаас (ХБҮЦ)-ны анхдагч зах зээлийн арилжаа өнөөдөр Чингис Хаан Хөрөнгийн Биржээр нээгдлээ. ₮50 тэрбумын энэ бүтээгдэхүүнийг тоогоор нь задалъя.

💸 Цаана нь: ₮424 тэрбумын хөрөнгөтэй компани

2008 оноос үйл ажиллагаа явуулж буй Нэткапитал 2026 оны III улирлын байдлаар ₮424 тэрбумын хөрөнгийг удирдаж ₮17.1 тэрбумын цэвэр ашигтай ажиллажээ. Мөн 2024, 2025 онд ТОП-100 аж ахуйн нэгжээр дараалан шалгарсан билээ. Тус компани 2025 онд анхны ХБҮЦ-аараа ₮30 тэрбумыг 20%-ийн өгөөжтэйгөөр бүрэн татан төвлөрүүлж байв.

🤔 ₮100,000-ийн хөрөнгө оруулалт хэд болох вэ?

Энэ удаагийн үнэт цаасны нийт хэмжээ ₮50 тэрбум бөгөөд нэгжийн үнэ ₮100,000, жилийн хүү 18.7%, хугацаа 24 сар байна. Жишээлбэл, ₮100,000-ийн үнэт цаас эзэмшигч эхний жилд ₮18,700, хоёр дахь жилд үлдэгдэл үндсэн төлбөр болох ₮50,000-д тооцсон ₮9,350-ийн хүү авна. Ингэснээр хоёр жилийн нийт хүү ₮28,050, 5%-ийн татвар суутгасны дараах хүүгийн орлого ₮26,647.5 болно. Үндсэн төлбөрийн 50%-ийг 12 дахь сард, үлдсэн хэсгийг 24 дэх сард буцаан олгоно гэсэн үг. 

📌 ХБҮЦ-ны гол онцлог ба эрсдэл

ХБҮЦ нь зээлийн багцын ирээдүйн мөнгөн урсгалд тулгуурлан санхүүжилт татах бүтэцтэй. Тиймээс хөрөнгө оруулагчид зөвхөн 18.7%-ийн хүүг бус, суурь зээлийн багцын чанар, эргэн төлөлт, хөрвөх чадварыг хамтад нь үнэлэх шаардлагатай.

⏰ Арилжаа эхэллээ

Нэткапитал ХБҮЦ 2.0-ын захиалга өнөөдөр буюу 11 сарын 9-нд Чингис Хаан Хөрөнгийн Биржээр дамжин эхэлж байна. Голомт Капитал ҮЦК үндсэн, Нэткапитал ҮЦК туслах андеррайтераар ажиллаж буй. Өмнөх удаагийн ₮30 тэрбумын үнэт цаас бүрэн захиалагдсан туршлагатай Нэткапитал энэ удаа ₮50 тэрбумын санхүүжилт татах зорилттой. Харин хөрөнгө оруулагчдын эрэлт ямар байхыг арилжааны явц харуулах нь.