ХасБанк (XAC)-ны хувьцааны үнэ санхүүгийн ашгаасаа хэд дахин хурдан өсөж, хөрөнгө оруулагчдын анхаарлыг татаж байна. Энэ талаар ухаж мэдэцгээе. 

📈 Ашиг 1.4 дахин VS Үнэ 2.6 дахин өсөв

2023 онд ₮62.2 тэрбум байсан хагас жилийн цэвэр ашиг 2026 онд ₮88.2 тэрбумд хүрч 1.4 дахин өслөө. Тэгвэл мөн хугацаанд сарын дундаж үнэ ₮636-аас ₮1,686 болж, 2.6 дахин буюу ашгаасаа хавьгүй хурдан өсжээ.

• 📌 Сүүлийн 1 жилд тус банкны хувьцааны үнэ 91% өсөж, зах зээлийн үнэлгээ нь анх удаа ₮1 их наядыг давсан ч нөгөө талд эхний 9 сарын цэвэр ашиг нь 10.8% өсөж ₮138.4 тэрбумд хүрсэн байна.

🔺🔻 Үнэлгээ тэлж, өгөөж шахагдав

Хувьцааны үнийн тасралтгүй өсөлтөөс шалтгаалан P/B харьцаа жилийн өмнөх 1.1-ээс 1.8 болж өсөв. Энэ нь үнэлгэ чангарч буйг илтгэнэ. Цаашлаад, P/E харьцаа 9.5 буюу ашгийн өгөөж 10.5% байна. Энэ нь бодлогын хүү болон инфляцаас доогуур байгаа бөгөөд тэдний өнгөрсөн оны эцэст хуваарилсан ногдол ашгийн өгөөж 3.3% л байсан аж. 

🪄 Анхаарах үзүүлэлт 

ХасБанкны санхүүгийн суурь үзүүлэлт тун дажгүй байгаа. Өөрийн хөрөнгийн өгөөж (ROE) 20.5%, чанаргүй зээл 2.2%, нэгдүгээр зэрэглэлийн өөрийн хөрөнгийн харьцаа 18.9% байна. Чанаргүй дүн нь салбарын хамгийн багад тооцогдсоор ирсэн билээ. 

• ⚠️ Гэхдээ тэдний муу ангиллын зээл жилийн дотор 64% өсөж ₮78.2 тэрбумд хүрсэн байна. Эрсдэлийн сангийн зардал 12% буурсан нь л ашгийг нэмэгдүүлсэн хэрэг.

Эцэст нь... Сүүлийн хэдэн сар ТОП-20 компанийн хувьцааны үнэ нэлээд өсөж байгаа. Хэрэв та хөрөнгө оруулалтын шийдвэрээ хараахан гаргаж амжаагүй байгаа бол өсөлтийг дагаж хөдлөхөөсөө өмнө сайтар судлахад гэмгүй биз ээ.